இந்து மதம்

ஒரே வழியைப் போதித்த புத்த மதத்தில்கூட ஹீனயானம், மஹாயானம் என்று இரு பிரிவுகள் உண்டு.

உலகமெங்கும் நன்கு பார்க்கையில், அந்த மதங்கள் பரவிய தேசத்திற்குத் தக்கவாறு பழைய, புதிய என்று மதங்கள் மாறுபட்டுள்ளதை நன்கு காண முடியும்.

கிறிஸ்துவ, இஸ்லாமிய மதங்களிலும் பிரிவினைகள் உண்டு. மற்ற மதங்களைப் பற்றி நாம் அதிகம் ஆராய்ச்சி செய்ய வேண்டாம் என்பதால் இங்கு அதிகம் எழுதவில்லை. 

அங்க, வங்க, கலிங்க என 56 தேசங்களாக பாரதம் பிரிந்திருந்ததாகக் கூறுவார்கள்

. சூழ்நிலைக்கேற்ப வழிபடும் தன்மைகள் இந்து மதத்தில் மாறுபாடு கொண்டது என்பதுதான் உண்மை

. வடதேசத்தில் சிவபெருமானை சிவலிலிங்க மாக வழிபடும்போது அனைவரும் தொட்டுப் பூஜிப்பார்கள்.திராவிட தேசத்தில் அனைவரும் தொட்டு வணங்கும் வழக்கம் இல்லை.

குளிர் மிகுந்த வடதேசத்தில் மேல் சட்டை அணிந்துதான் பூசாரிகள் பூஜை செய்வார்கள். திராவிட தேசத்தில் தைத்த உடை அணியும் பழக்கம் இல்லை. கட்டாயம் மேல் வஸ்திரம் அணியாமல் இடுப்பில் துண்டைக் கட்டிக் கொண்டுதான் பூஜிப்பார்கள்.

ஆக, அனுஷ்டானம் என்பது இயற்கைச் சூழ்நிலைக் கேற்ப இந்து மதத்தில் மாறுதல் பெற்றுள்ளது. 

மேலும், கடினமான வேள்வி, தவம் போன்றவற்றை ஆண்கள் செய்யலாம் என்றும்; மென்மையான பஜனை, கடினமில்லாத பூஜை வகைகளைப் பெண்களுக்கும் ஒதுக்கப்பட்டது

. அது சரீர தர்மமே தவிர, வேறு பெரிய காரணம் எதுவும் இல்லை.

சபையில் ஆண்- பெண் இருபாலருக்கும் அந்தக் காலத்தில் விவாதங்களில் சம உரிமை அளிக்கப்பட்டது.

வில்வத்தின் மகிமை - Vilvam magimai

வில்வாஷ்டகத்தில் வில்வத்தின் மகிமை விரிவாகச் சொல்லப்பட்டுள்ளது.

ஒரு வில்வத்தை எடுத்து சிவபெருமானின் திருவடியில் சேர்த்தால் மூன்று ஜென்ம பாவம் விலகும் என்று உள்ளது.

ஒரு குரங்கைப் புலி துரத்த, அந்தக் குரங்கு வில்வ மரத்தின்மேல் ஏறி பயந்து நடுங்கி வில்வ இலைகளை உதிர்த்தது. அங்கு பழைய சிவலிங்கம் ஒன்று வில்வமரத்தின் கீழ் இருக்க, அந்த சிவலிங்கத்தின் மேல் வில்வ இலைகள் விழுந்தன

. அது ஒரு மாலை நேரம். நித்திய பிரதோஷ வேளையில் சிவபெருமானைப் பூஜித்த பலன் குரங்குக்குக் கிடைத்து; அதனால் அந்தக் குரங்கு சக்கரவர்த்தியாகப் பிறந்தது என்பார்கள்.

வில்வ தளம் வாடியிருந்தாலும் பூஜிக்கத் தகுந்தது. 

வில்வ மரத்தின் கீழ் இயற்கையாக மரணம் அடைபவன் சிவலோகப் பதவி அடைகிறான்.

Source: http://www.penmai.com/forums/spiritual-queries/22269-vilvam-magimai.html#ixzz21RFdKWPl

இன்று ஆடிப்பூரம் : வளங்களை வாரி வழங்கும் வளையல் பிரசாதம்

ஆடி மாதம் கடக ராசியான சந்திரன் வீட்டில் சூரியனும், சூரியனின் ராசியான சிம்மத்தில் சந்திரனும் பரிவர்த்தனை யோகத்தில் சஞ்சரிக்கும் நள வருடம், 
சனிக்கிழமை, பூரம் நட்சத்திரம், சுக்லபட்சம், சதுர்த்தசி திதி கூடிய நன்னாள் அது, ஸ்ரீவில்லிபுத்தூர் கோயில் நந்தவனத்தில் விஷ்ணு சித்தர் என்ற பெரியாழ்வார் 
பூ பறித்துக் கொண்டிருந்தார். அப்போது, புதர் மண்டியிருந்த இடத்தில் இருந்து குழந்தையின் அழுகுரல் சத்தம் கேட்டது. அங்கு சென்றவர் துளசி செடியின் அடியில் கை, கால்களை உதைத்துக் கொண்டு அழகிய பெண் குழந்தை இருப்பதை பார்த்து ஆச்சரியம் மேலிட்டார். 

குழந்தையை கையில் எடுத்து உச்சி முகர்ந்தார். ஆண்டவன் தனக்கு அருளிய குழந்தை என்று ஆனந்தம் அடைந்தார். ‘கோதை’ என்று பெயர் சூட்டி அன்போடும், பாசத்தோடும் வளர்த்து வந்தார். நாளொரு மேனியும், பொழுதொரு வண்ணமாக வளர்ந்த கோதைக்கு பரந்தாமன் மீது பக்தி அதிகரித்தது. சகல சாஸ்திர ஞானங்கள் இயற்கையாகவே மளமளவென்று வர ஆரம்பித்தது. பல பாசுரங்களையும், திருமொழி நூல்களையும் பாற்கடல் வாசன் மீது பாடினார்.
இதற்கிடையில் தீவிர பக்தியானது காதலாக மாறியது. கனவில் மட்டுமின்றி, நிஜத்திலும் கண்ணனை தன் மணாளனாக நினைக்க ஆரம்பித்தாள். ஒரு கட்டத்தில் திருவரங்கனையே மணப்பது என்ற உறுதியும் பூண்டாள்.

தினமும் பூ பறித்து அதை மாலையாக தொடுத்து பெருமாளுக்கு சாற்றுவது பெரியாழ்வாரின் வழக்கம். அந்த திருப்பணியை அவர் செவ்வனே செய்து வந்தார். 
ஒருநாள் அங்கு வந்த கோதை, ‘என் மனதுக்கு பிடித்தவன் அணியப்போகும் மாலைதானே.. நான் அணிந்துவிட்டு கொடுத்தால்தான் என்ன’ என்று நினைத்து அந்த மாலையை அணிந்து அழகு பார்ப்பாள். மீண்டும் அதை பழையபடி வைத்துவிடுவாள். இது பல நாட்களாக தொடர்ந்து நடந்துகொண்டிருந்தது.
ஒருநாள் வெளியே சென்றுவிட்டு அவசரமாக வீட்டுக்கு வந்த பெரியாழ்வார், பெருமாளுக்கான மாலையை கோதை சூடி அழகு பார்த்துக் கொண்டிருப்பதை பார்த்து 
பதறி விட்டார். ‘அபசாரம், அபசாரம். 

ஆண்டவனுக்காக தொடுத்து வைத்திருக்கும் மாலையை சூடலாமா’ என்று கோபத்துடன் கடிந்துகொண்டார். பின்பு அவசர அவசரமாக பூக்களை தொடுத்து புதுமாலையை எடுத்துக்கொண்டு போய் பெருமாளுக்கு சாற்றினார்.அன்று இரவு பெரியாழ்வார் அசந்து தூங்கிக் கொண்டிருந்தார். அவரது கனவில் அரங்கன் தோன்றி, ‘கோதை என்மீது மிகுந்த பிரியமும் பக்தியும் வைத்திருக்கிறாள். அவள் சூடிக் கொடுத்த மாலையை தினமும் மிகுந்த அன்புடன் ஏற்று வந்தேன். 

இன்று என்னவாயிற்று?’ என்று கேட்கிறார். பரந்தாமனே இப்படிக் கேட்டதில் பெரியாழ்வாருக்கு அதிர்ச்சி கலந்த ஆச்சரியம். கோதையின் பக்தியை உணர்கிறார். பக்தியாலும், அன்பாலும் பரமனையே அவள் வசப்படுத்தியிருப்பதை உணர்ந்து ஆனந்த கண்ணீர் வடிக்கிறார். பகவானின் உள்ளத்தையே ஆண்ட கோதையை அன்று முதல் ‘ஆண்டாள்’ என்ற திருநாமம் சூட்டி அழைத்தார். பெருமாளின் விருப்பத்துக்கு ஏற்ப அவள் சூடிக் கொடுக்கும்  மாலையையே பெருமாளுக்கு சாற்றி வந்தார். ஆண்டாளுக்கு உரிய வயது வந்தவுடன் மாப்பிள்ளை பார்க்க ஆரம்பிக்கிறார் பெரியாழ்வார். ஆனால் ஆண்டாளோ, ‘ஸ்ரீரங்கத்தில் இருக்கும் பெருமாளே என் காதலன். அவரன்றி வேறொருவரை மனதால்கூட நினைக்க முடியாது’ என தீர்க்கமாக 
சொல்லிவிட்டாள். குழப்பத்தில் இருக்கும் பெரியாழ்வாருக்கு மீண்டும் கனவில் தோன்றிய அரங்கன், ‘ஆண்டாள் விருப்பப்படியே திருவரங்கத்திற்கு அழைத்து வா’ என்று சொல்லி மறைகிறான்.

‘கனவில் வந்து இறைவன் சொன்னது உண்மைதானா? கனவில் சுவாமி சொன்னார் என்றால் யாரும் சிரிக்க மாட்டார்களா? எதை நம்பி ஆண்டாளை ஸ்ரீரங்கத்துக்கு அழைத்துப் போவது?’ என்றெல்லாம் ஆயிரமாயிரம் சந்தேகத்துடனும், தயக்கத்துடனும் ஆண்டாளுடன் ஸ்ரீரங்கம் வந்தடைந்தார் பெரியாழ்வார். ஊர் எல்லையில் ஏராளமான வேத விற்பன்னர்கள், பொதுமக்கள் திரளாக கூடியிருந்ததை பார்த்ததும் ஏதோ திருவிழா என்று நினைக்கிறார். வந்திருப்பது 
பெரியாழ்வாரும், ஆண்டாளும் என்று தெரிந்து கொண்டதும், வேத விற்பன்னர்களும், ஆலய முக்கியஸ்தர்களும் ஓடோடி வந்து வரவேற்று வணங்குகிறார்கள் ‘தன்னை மணந்துகொள்ள சாட்சாத் மகாலட்சுமியே வருவதாக எங்கள் கனவில் அரங்கநாத பெருமான் நேற்று சொன்னார்.

மகாலட்சுமியை வரவேற்கத்தான் திரண்டிருக்கிறோம். சூடிக்கொடுத்த சுடர்க்கொடியை பெருமாள் திருமணம் செய்துகொள்வதாக கூறியிருப்பதால் கல்யாண வைபவத்துக்கு எல்லா ஏற்பாடுகளும் செய்திருக்கிறோம்’ என்கிறார்கள். அரங்கனின் திருவுளத்தை எண்ணி மெய்சிலிர்க்கிறார் பெரியாழ்வார். அதே நேரத்தில் சடங்கு, சம்பிரதாயங்களுக்கு காத்திருக்கும் அளவுக்கு ஆண்டாளுக்கு பொறுமை இல்லை. ‘ஸ்ரீரங்கா’ என்று உரக்க கூறியபடியே கோயில் கருவறைக்கு ஓடுகிறாள். அக்கணமே ஆண்டவனுடன் ஐக்கியமாகிறாள். பகவானின் கைத்தலம் பற்றி, வடிவால் அவன் வலமார்பினில் வாழ்கின்ற மங்கையாக அருள்பாலிக்கிறாள். இதுவே ஆண்டாளின் திவ்ய சரித்திரமாகும்.

ஆடிப்பூர நாயகியான ஆண்டாள் இறைவனுடன் இரண்டற கலப்பதற்கு முன் திருப்பாவை, நாச்சியார் திருமொழி என்னும் 2 நூல்களை நமக்கு அருளித் தந்துள்ளார். எப்படி வாழ வேண்டும், எப்படி பக்தி செலுத்த வேண்டும் என்பதை இந்த பாசுரங்களில் உணர்த்தியிருக்கிறார். இதில் திருப்பாவை என்னும் ‘சங்கத் தமிழ் மாலை’ 30 பாசுரங்கள் கொண்டது. மார்கழி மாதம் பாவை நோன்பு நோற்று தினமும் ஒரு பாடல் வீதம், மாதம் முழுவதும் ஒவ்வொரு பாடலாக பாடி 
இந்த பிறவி பெருங்கடலை நீந்திக் கடக்க அருள்புரிந்துள்ளார். நாச்சியார் திருமொழி 143 பாடல்கள் கொண்ட தொகுப்பாகும். இதில் ‘வாரணமாயிரம்’ என 
தொடங்கும் பத்து பாடல்கள் திருமண பாடல்களாகும். 
இவை இரண்டையும் பக்தி சிரத்தையுடன் படிக்க தீங்கின்றி நாடெங்கும் மழை பொழியும், கன்னிப் பெண்களுக்கு தடைகள், தோஷங்கள் நீங்கி திருமண பிராப்தம் கூடிவரும் என்பது ஐதீகமாகும். ஆடிப்பூர நாளில் அம்மன், அம்பாள், பெருமாள் கோயில்களில் சிறப்பு வழிபாடு நடக்கும். ஸ்ரீவில்லிபுத்தூர் உள்ளிட்ட தலங்களில் திருத்தேரோட்ட உற்சவம் நடக்கும். அன்னை ஆதிபராசக்தி சுயம்புவாக அருள்பாலிக்கும் மேல்மருவத்தூரிலும் ஆடிப்பூர உற்சவம் வெகு விமரிசையாக நடக்கிறது. எல்லா கோயில்களிலும் அம்மன், அம்பாளுக்கு வளையல் சாற்றுவார்கள், பக்தர்கள் காணிக்கையாக தரும் வளையல்களை அம்மனுக்கு சாற்றிவிட்டு பின்னர் அதை மங்கள பிரசாதமாக தருவார்கள். இதை அணிந்துகொண்டால் திருமண பாக்யம், குழந்தை பாக்யம் கிடைக்கும் என்பது நம்பிக்கை. இந்நாளில் சகல நலங்களையும், வளங்களையும், நீங்காத செல்வத்தையும் பெற அவள் பாதம் பணிவோமாக.

ஆபத்துகளிலிருந்து காக்கும் ஆலங்குடி குருபகவான்

ஆலங்குடி, குருபகவானாம் தட்சிணாமூர்த்தி உறையும் தலம். மூர்த்தி-தலம்-தீர்த்தம் இவற்றால் மிகவும் உயர்ந்த புண்ணிய க்ஷேத்திரம் ஆகும். கலியுகத்தில் நாம் காலத்தை நலமாக கடத்துவது என்பது அத்துணை எளிதன்று என பல ஆயிரம் ஆண்டுகளுக்கு முன்னர் வாழ்ந்த நம் மூதாதையர்கள், சான்றோர்கள் ஞான வழி நின்று உணர்ந்து, வானில் உறையும் தேவர்களை, பூமியில் வீற்றிருந்து அருள்பரிபாலிக்குமாறு பிரார்த்தித்து, அவ்வாறே சித்தி பெற்ற பல்வேறு புண்ணிய க்ஷேத்திரங்களுள் உயர்ந்தது ஆலங்குடி குருபகவான் கோயில். பஞ்ச ஆரண்ய க்ஷேத்திரங்களுள் பிரம்மனால் போற்றப்படும் புண்ணியத் தலம் இது.

‘‘அயனும் அன்புற்று இரும்பூளை
இடங்கொண்டானை யேத்தும்’’
- என்கின்றார் அகத்தியர். ஆபத்துச் சகாய ஈசன் இங்கு கோயில் கொண்டிருக்கின்றார். 

இன்றும் சாயரட்சை பூஜையில், குறிப்பாக குருவாரம் எனப்படும் வியாழக்கிழமை அன்று இங்கு இறைவனை பூஜிக்கையில், பற்பல சித்தர்களும் முனிவர்களும் வந்திருந்து ஆசி கூறுவார்கள். எனவே எப்போதும் சாயரட்சை பூஜையில், வியாழக்கிழமை தட்சிணாமூர்த்தியாம் குருபகவானை வழிபடுதல் பெருத்த நன்மை பயக்கும். வித்தை தொழில் அபிவிருத்தி கூடும். அனுதினமும் சாயரட்சை பூஜையில் அகத்தியரும் விஸ்வாமித்திரரும் இன்றும் ஆபத்சகாய ஈசனை தொழுகின்றனர்.

அமுதோகர் என்ற சிவனடியார் எழுப்பிய இந்த கோயிலை மயனே கட்டித் தந்தார் என்கிறது நாடி.
‘‘ஆரூரமுதோகருக்கு மயனு
மண்டியிட்டு தோற்றின வலம்பலமிது
கோசிகனுங் குடமுனியுந் தொழ
யிரும்பூளை ஈசனுக்கு அடிமை
யன்றி போக்கிடமேது’’
- என்கிறார் அகத்தியர். 
இன்றும் அகத்தியர் அரூபமாகி ஆங்கு வீற்றிருப்பதினாலே, அகத்தியரை பூஜித்த பின்னர்தான் முருகப் பெருமானைத் தொழ வேணும் என்கிறது நாடி சாத்திரம்.

ஒருமுறை அமிர்தம் என்ற சாவா மருந்தை அடைய தேவர்களும் அசுரர்களும் திருப்பாற்கடலை கடைந்தனர். அப்போது தோன்றிய ஆலகாலம் என்ற கொடிய நஞ்சு, வழிந்து கொட்டியது இந்த இடத்தில்தான். ஆபத்து களையும் ஈசன், விநாயகப் பெருமான் வேண்டுதலை ஏற்று ஆலகால நஞ்சை எடுத்து உண்டார். ஆலகால நஞ்சைக் குடித்த இடமே ஆலங்குடி என வழங்கலாயிற்று.
நஞ்சு பூமியை நோக்கி வருகையில், பிரபஞ்சத்தில் உள்ள அனைத்து உயிரினங்களும் அஞ்சி கலக்கமுற்றன. அகத்தியனும் விஸ்வாமித்திர முனிவனும் விநாயகரை தொழ, விநாயகர் ஈசனை கொண்டு ஆலகால நஞ்சை உண்ணச் செய்து எல்லா உயிரினங்களின் கலக்கத்தையும் போக்கி அருளினார். எனவே இங்கு கோபுர வாயிலில் உள்ள விநாயகரை இன்றளவும் ‘கலங்காமல் காத்த விநாயகர்’ என தேவரும் கொண்டாடி வருகின்றனர் என நாடி கூறுகிறது.

‘‘கணநாதன் கலக்கஞ்சுட்டு
ஓம்பினான் உயிரினமெல்லாமிந்நாதனை
கலங்காது காத்தானென தொழ நிற்பரே’’
- என்றார் அகத்தியர். 

இன்றும் இந்த ஆலங்குடி ஊரில் விஷம் தீண்டி யாரும் உயிர் நீத்ததில்லை. அம்பாள் ஏலவார் குழலி, தெற்கு திருமுகம் கொண்டு சேவை சாதிக்கிறாள். எம பயம் இவரை தொழுபவருக்கு அண்டாது. மேலும் பெரும் விபத்து, நோய் போன்றவை பற்றாது. திருமணத் தடை நீங்கும்.

தாமரைத் தண்டு நூலில் நெய் கொண்டு தீபம் ஏற்றி, கடலை மாலை சாத்தி, வில்வார்ச்சனை செய்தால் குருவால் ஏற்படும் தோஷம் பூர்ணமாக விலகும். இங்குள்ள முருகன் சந்நதி மிகவும் சக்தி வாய்ந்தது. குடமுனியாம் அகத்திய முனிவரை நெஞ்சாரத் தொழுது ஒரு முகமாய் முருகனை வழிபடுவோருக்கு பேய், பிசாசு போன்றவைகளால் ஏற்படும் உபாதை நீங்கும். கொடிய நோய்கள் விலகி உடல் சுகம் காணும்.

‘‘நாகனை நின்றேத்துவார்
தம் பீடை கலைய கண்டோமே-
பெருஞ் செல்வமொடு மேனி
மெருகு கூடவுஞ் செயுமே’’ 
- என்ற அகத்தியர் தம் செய்யுளில் இருந்து நாகர் சந்நதியின் மகிமையை உணர 
முடிகின்றது.

ஞானசம்பந்தருக்கு வியாழ பகவான் காட்சி அருளிய தலம், கடன் உபாதைகளை முற்றிலும் கலைய நிற்கும் மூர்த்தி இந்த ஆலங்குடி நாதன். சரும ரோகம், ஈரல், கண், எலும்பு போன்றவற்றில் வரும் பீடைகளை முற்றிலும் களையும் மூர்த்தி இங்குறையும் தட்சிணாமூர்த்தி. இவரே குருபகவான். எளிதில் பக்தர்களின் கோரிக்கைகளை நிறைவேற்றி தரும் புண்ணிய மூர்த்தி.

‘‘ஈடொன்றுமில்லை சொன்னோம்
வெந்த மேனியும் மெருகேறும்
நைந்த அகமும் ஆனந்தக்
கூத்தாடும். நெஞ்சாரத்
தொழுது ஆலங்குடி அணைபவர்
தம் இல் பொன்னாகும்
பொய்யன்றே’’
- என்கிறார், முனிவர்.
குருபகவானே, திருமணம், தொழில், கல்வி, ஆரோக்யம், நட்பு, கௌரவம், கீர்த்தி, செல்வம் இவற்றிற்கெல்லாம் ஆணிவேர் போன்றவர். ஜாதகத்தில் 3, 6, 8, 10, 12ம் இடங்களில் இவர் சற்று தோஷப்படுவார். கேது, ராகு போன்ற சாயா கிரஹ சேர்க்கையால் சோதனை பல தருவார். மூர்க்க கிரகங்களின் பார்வையாலும் வியாழன் துர்பலனைத் தருவார். வியாழன் அன்று நீச ஸ்திரீ போகம், துர் ஸ்வப்பனம், கருமாதி உண்டி, தீட்டு சாப்பாடு, கோடி வஸ்திரம் உடுத்தல் போன்றன தோஷம் ஆகும்.

அறியாது செய்யும் அபசாரத்தால் ஏற்படும் தோஷத்தில் இருந்து விடுபட, வியாழன் தசை பெருத்த நன்மை தர, சந்திரனுக்கு மறைவான வீட்டில் குரு இருந்தால் ஏற்படும் விக்கினங்கள் விலக, நாம் ஒதுங்கி  நின்று தொழுது விமோசனம் பெற, இக்கலியில் உள்ள ஒரு புண்ணிய க்ஷேத்திரமே இந்த ஆலங்குடி கோயில்.

புண்ணியங்கள் தரும் முன்னோர் வழிபாடு : ஆடி அமாவாசை

ஜோதிட சாஸ்திரத்தில் அயனம், பருவம், மாதம் பட்சம், வாரம், நாள், நட்சத்திரம், திதி என பல அம்சங்கள் உள்ளன. இவை ஒன்றோடு ஒன்று சேர்ந்து வரும்போதோ, தனித்து வரும்போதோ ஒவ்வொரு விரதங்கள், பண்டிகைகள் கொண்டாடப்படுகின்றன. அயனம் என்பது வருடத்தின் இரண்டு பகுதிகள். அதாவது, சூரியனின் பயணத்தை அடிப்படையாக கொண்டு பிரிக்கப்பட்ட கால அளவு. தை மாதம் முதல் ஆனி மாதம் வரை உள்ள காலம் உத்தராயணம். சூரியன் உதிப்பது கிழக்கு பகுதி என்றாலும், சற்று வடக்கு பக்கம் நகர்ந்த நிலையில் சூர்யோதயம் நடக்கும். ஆடி மாதம் முதல் மார்கழி வரை உள்ள காலம் தட்சிணாயனம். அதாவது சூரியன் தெற்கு நோக்கி நகரத் தொடங்கும் காலம். இது ஆடி மாதத்தில் தொடங்குகிறது.

வான சாஸ்திர, ஜோதிட சாஸ்திர அடிப்படையில் சூரியன், சந்திரன் ஒரே ராசியில் இணைவதே அமாவாசை. ஒவ்வொரு தமிழ் மாதமும் சூரியன் ஒவ்வொரு ராசியில் இருப்பார். அந்த சுழற்சி முறைப்படி ஆடி மாதம் கடக ராசியில் இருப்பார். அந்த நேரத்தில் தினக்கோளான சந்திரன் கடக ராசியில் சூரியனுடன் சேரும் நாளே ஆடி அமாவாசை.

ஜோதிட சாஸ்திரத்தில் பல திதிகள் இருந்தாலும், சஷ்டி, அஷ்டமி, நவமி, ஏகாதசி, பவுர்ணமி, அமாவாசை போன்ற திதிகள் முக்கியத்துவம் வாய்ந்ததாக கூறப்படுகிறது. மிகவும் முக்கியத்துவம், சிறப்பம்சம் நிறைந்ததாக கூறப்படும் திதி அமாவாசை. முன்னோர் வழிபாட்டுக்கு மிகவும் ஏற்றது அமாவாசை திதியாகும். ஆண்டுக்கொரு முறை அவர்களது திதி நாளில் திவசம், சிரார்த்தம் செய்தாலும் மாதந்தோறும் அமாவாசையன்று நீர் நிலைகளில் நீராடி தர்ப்பணம் செய்வது புண்ணிய காரியமாக சொல்லப்பட்டுள்ளது. அதிலும் ஆடி அமாவாசை மிகவும் விசேஷமாகும்.

சூரியன் பிதுர்க்காரகன், சந்திரன் மாதூர்க்காரகன். இவர்களை சிவசக்தி சொரூபமாக சாஸ்திரங்கள் கூறுகின்றன. இந்த இரண்டு கிரகங்கள் சேரும் புனிதமான ஆடி அமாவாசையன்று, முன்னோரையும் மறைந்த தாய், தந்தையரையும் நினைத்து திதி கொடுப்பது. புண்ணிய நதிகள், கடல் போன்ற இடங்களில் புனித நீராடி இஷ்டதெய்வ ஆலயங்களில் வழிபாடு, சிறப்பு பூஜைகள் செய்வது, ஏழைகள், இல்லாதோர், இயலாதோருக்கு அன்னதானம், வஸ்திரதானம் செய்வது நாம் செய்த பாவங்கள், கர்மவினைகள், தீவினைகள் அனைத்தையும் போக்கி வாழ்வில் புண்ணியத்தை சேர்க்கும் என்பது நம்பிக்கை. இத்தகைய வழிபாடுகளால் முன்னோர் செய்த பாவ வினைகள் நீங்கி அவர்களுக்கு முக்தி கிட்டும். அவர்களது பரிபூரண ஆசீர்வாதம் குடும்பத்தினர் அனைவருக்கும் கிடைக்கும் என்பது ஐதீகம்.

இறந்த தாய், தந்தைக்கு அவர்களது திதி நாளில் அவர்களை நினைத்து வணங்கி சிரார்த்தம் செய்வது மகனின் முக்கிய கடமையாக கூறப்படுகிறது. தாய், தந்தை இறந்த தேதி, திதி ஆகியவற்றை மறந்தவர்கள், தவற விட்டவர்கள் கவலைப்பட தேவையில்லை, அவர்கள் ஆடி அமாவாசையன்று திதி கொடுக்கலாம். இறந்தவர்களை நினைத்து அன்றைய தினம் வீட்டில் அவர்கள் படத்துக்கு மாலை போட்டு, அவர்களுக்கு பிடித்தமான உணவு வகைகளை தலைவாழை இலையில் படைத்து அவர்களை வணங்க வேண்டும். முதலில் காகத்துக்கு உணவிட்டு பின்பு விரதம் முடிக்க கர்ம வினைகள் நீங்கும் என்பது நம்பிக்கை.

ஆடி அமாவாசையன்று பல கோயில்களில் சிறப்பு பூஜைகள், வழிபாடுகள் நடக்கின்றன. குறிப்பாக கிராமங்களில் சக்தி, அம்மன், கிராம தேவதைகள், ஐயனார், முனீஸ்வரன், கருப்பண்ணசாமி போன்ற காவல் தெய்வங்களுக்கு படையலிட்டு, பலி கொடுத்து பூஜைகள் இன்றளவும் விமரிசையாக நடக்கின்றன. அமாவாசை நடுநிசி பூஜைகளும் சில இடங்களில் விசேஷமாக நடத்தப்படுகின்றன. அதேபோல் திருஷ்டி, தோஷம் கழிப்பு போன்ற மந்திர, தந்திர சடங்குகளையும் அமாவாசையில்தான் செய்வார்கள், தொடங்குவார்கள்.

‘அமாவாசை என்பது நிறைந்த நாள்’ என்று சொல்லி நல்ல காரியங்களை ஆரம்பிக்கும் வழக்கம் சமீபகாலமாக உள்ளது. சாஸ்திரத்தில் இதற்கான ஆதாரம், சான்றுகள் இல்லை. அமாவாசை என்பது இருட்டு நாள். நீத்தார் நினைவு நாள் என்றே பல நூல்களில் குறிப்பிடப்பட்டுள்ளது. பிரதோஷ கால பூஜையில் திரயோதசி திதி முதல் பிரதமை திதி வரை எந்த புது காரியமும் தொடங்க கூடாது என பிரதோஷ வழிபாடு வலியுறுத்துகிறது. ஆகையால் அமாவாசையை நீத்தார் நினைவு கூர்வதற்கு மட்டுமே பயன்படுத்துவது நலம் தரும். ஆடி அமாவாசையன்று முன்னோரை நினைத்து வழிபடுவோம். அவர்களது ஆசியையும், இறைவனின் அருளையும் பெறுவோம்.

இன்று ஆடி முதல் வெள்ளி : அம்மன் கோயில்களில் பெண்கள் சிறப்பு வழிபாடு

ஊத்துக்கோட்டை: ஆடி மாத முதல் வெள்ளிக்கிழமை என்பதால் அம்மன் கோயில்களில் பெண்கள் பொங்கல் வைத்து சிறப்பு வழிபாடு செய்தனர். ஆடி மாதம் அம்மனுக்கு உகந்த மாதமாகும். இந்த மாதத்தில் அம்மன் கோயில்களில் திருவிழாக்கள் நடக்கும். பக்தர்கள் விரதம் இருந்து அலகு குத்தி, தீச்சட்டி ஏந்தி, 

தொங்கும் பல்லக்கில் சென்று அம்மனுக்கு நேர்த்தி கடனை செலுத்துவர். ஆடி வெள்ளிக்கிழமைகளில் பெண்கள் சிறப்பு வழிபாடு நடத்துவதுண்டு. இன்று ஆடி, 

முதல் வெள்ளிக்கிழமை என்பதால் கோயில்கள் பெண்கள் கூட்டம் அலைமோதியது. 

திருவள்ளூர் வேம்புலியம்மன், புட்லூர் அங்காள பரமேஸ்வரி, பெரியபாளையம் பவானி அம்மன் கோயில்களில் பக்தர்கள் திரண்டிருந்தனர். பெண்கள் மஞ்சள் ஆடை உடுத்தி அம்மனுக்கு தீபம் ஏற்றினர். சிலர் பொங்கல் வைத்து வழிபட்டனர். பெரியபாளையம் பவானி அம்மன் கோயிலில் ஆடி முதல் வெள்ளிக்கிழமை என்பதால் ஊத்துக்கோட்டை, பாலவாக்கம், தண்டலம், ஆத்துப்பாக்கம், வெங்கல், தாமரைபாக்கம் உள்ளிட்ட பல்வேறு பகுதியில் இருந்து பெண்கள் மஞ்சள் ஆடை அணிந்து பாதயாத்திரையாக சென்றனர். அங்குள்ள புற்றில் பால் ஊற்றி பவானி அம்மனை வழிப்பட்டனர். 

முன்னதாக இன்று அதிகாலை பவானி அம்மனுக்கு பால், தயிர், பன்னீர், சந்தனம் உள்ளிட்ட வாசனை திரவியங்களால் சிறப்பு அபிஷேகம் நடந்தது.

காஞ்சிபுரத்தில் பிரசித்தி பெற்ற காமாட்சியம்மன், ஆதிகாமாட்சியம்மன், கருக்கினில் அமர்ந்தவள் அம்மன், திரவுபதி அம்மன், தும்பவனத்தம்மன் கோயில்கள் உள்ளன. மாமல்லபுரம், கல்பாக்கம் செங்கல்பட்டு, ஸ்ரீபெரும்புதூர், மதுராந்தகம் உள்ளிட்ட மாவட்டத்தின் பல்வேறு பகுதியில் உள்ள துர்க்கையம்மன், கங்கையம்மன், ஊத்துக்காட்டு அம்மன் கோயில்களில் இன்று அம்மனுக்கு பால், தயிர், சந்தனம், பன்னீர் உள்ளிட்ட வாசனை திரவியங்கள் மூலம் சிறப்பு அபிஷேகம் நடந்தது. பெண்கள் கோயிலில் பொங்கல் வைத்து வழிபட்டனர். பால்குடம் எடுத்து வந்து அம்மனுக்கு பாலாபிஷேகம் செய்தனர்.

ஒரே லிங்கத்தில் ஆயிரம் லிங்கங்கள்

ராமநாதபுரத்தில் இருந்து 12 கி.மீ. தொலைவில் உள்ளது உத்தர கோச மங்கை. இங்குள்ள மங்களநாத சுவாமி கோவிலில் நடராஜருக்கு தனி சன்னதி உள்ளது. இங்கு வேறு எங்கும் காண முடியாத ஐந்தே முக்கால் அடி உயர மரகத நடராஜர் சிலை உள்ளது. மரகதத்தால் ஆன இந்த சிலை ஆண்டு முழுவதும் சந்தனக்காப்பு அலங்காரத்திலேயே இருக்கும். மார்கழி மாதத்தில் வரும் திருவாதிரைக்கு முந்தைய நாள் ஆருத்ரா தரிசனத்தின் போது, வருடத்தில் ஒரு நாள் மட்டும் மரகத வடிவத்தில், பச்சை வண்ணத்தில் நடராஜரை தரிசிக்கலாம். 

தினமும் மதியம் 12 மணிக்கு மேல் சிறப்பு வழிபாடு நடைபெறும். நடராஜர் கோவில் இருக்கும் இடத்திற்கு முன்பாக 3000 ஆண்டுகளுக்கு முந்தைய இலந்தை மரம் இன்றும் உள்ளது. இது இக்கோவிலின் தல விருட்சம். மேலும், இலந்தை மர அருகில் ஒரு லிங்கம் உள்ளது. இதில் ஒரு வரிசைக்கு 50 லிங்கம் என்ற கணக்கில் 20 வரிசைகளில் 1000 லிங்கங்கள் கொண்ட அமைப்பு உள்ளது. இப்படி வேறு எந்தக் கோவிலிலும் கிடையாது.

ஞாயிற்றுக்கிழமை சொல்ல வேண்டிய விநாயகர் ஸ்லோகம்

வாக்குண்டாம் நல்ல மனமுண்டாம் மாமலராள் நோக்குண்டாம் மேனி நுடங்காது-பூக்கொண்டு துப்பார்